History Of Kurdistan مالپه‌رێكی تایبه‌ته به مێژووی كورد و جیهان
وتارێکی فەرهاد پیرباڵ نەوەیەکی شێخ مەحمود توڕە دەکات
یەکێک لەنەوەکانی شێخ مەحمود وەڵامی نوسینێکی فەرهاد پیرباڵ دەداتەوەو رایدەگەیەنێت کە پێی سەیرە پارتی ئەو دەرفەتە دەڕەخسێنێت بۆ سوکایەتیکردن بەشێخ مەحمود، پارێزگای هەولێریش رونکردنەوەیەک لەو بارەیەوە بڵاودەکاتەوەو دەڵێت “مەلیک مەحمودی نەمر رەمزێکی گەورەی کوردە و بۆ ھەولێریش شانازییە پەیکەرەکەی لە ئامێز بگرێت.“
ئاوێنە: مەحمود کاوە حەفیدزادە، یەکێک لەنەوەکانی شێخ مەحمودی مەلیکی کوردستان لەبیستەکانی سەدەی رابردو، نوسینێکی لەپێگەی تایبەتی خۆی لەفەیسبوک بڵاوکردوەتەوەو نیگەرانی خۆی پیشان دەدات لەنوسینێکی فەرهاد پیرباڵ لەبارەی شێخ مەحمود.
حەفیدزادە رایدەگەیەنێت کە “بۆ یەكەمجار نیە لە ماوەی دو ساڵی ڕابوردودا، میدیا و دەزگاكانی ڕاگەیاندنی پارتی، لەڕێگەی چەند كەسانێكی كۆیلەو ئاراستەكراوەوە هێرشی بەمەبەست و بەئامانج دەكەنە سەر شێخ محمودی حەفید هێمای بەرخۆدانی كوردایەتی . تەنانەت سوكایەتی كردن بەڕێبەرانی تەریقەتی قادری و شیواندنی مێژوویی ڕوداوەكان” .
هەروەها دەشڵێت “پێم سەیرە پارتی دیموكراتی كوردستان ڕێگە دەدات و ئەودەرفەتە دەڕەخسێنێ بۆ سوكایەتی كردن بە مێژوویی خەباتی شێخ محمودی نەمرو تەنانەت شاری سلێمانیش” .
لەچەند رۆژی رابردودا، فەرهاد پیرباڵ نوسینێکی بڵاوکردەوە لەژێر ناونیشانی
“فەقیرانە-ی ناو حكومەتەكەی مەلیك مەحمود”.
پیرباڵ لەو نوسینەیدا ئاماژەی بەوە کردوە کە “لەناو رۆژنامەكانی سەردەمی شێخ مەحمود، لەناو لیستی ئەوانەی “فەقیرانە”یان لە بەلەدییەی سلێمانی وەرگرتوە، ناوی دەیان بەگ و ئاغا و شێخ و بەگزادە دەبینیت، وەك (سواڵكەر!) ناویان لە رۆژنامەكەی شێخ مەحمووددا تۆمار كراون، “فەقیرانە- سۆسیال”یان لە حكوومەتی مەلیك مەحموود وەرگرتووە!”.
ئەو نوسەرە دەشپرسێت “ئەرێ “فەقیرانە وەرگرتن” لەلایەن بەگ و ئاغا و بەگزادەكانەوە لەناو حكوومەتەكەی شێخ مەحموود، شتێكی رەوا بووە؟ یان ئایا وەك “بن دیوار”ی ئێستە (گەندەڵی) بووە؟”
نەوەکەی شێخ مەحمود لەوەڵامی فەرهاد پیرباڵدا دەڵێت “فەرهاد پیرباڵ لەیەكێك لە سایتە سێبەرەكانی پارتیەوە سوكایەتی بەمێژوویی خەباتی شێخ محمود دەكات و لەهەمان كات ڕەخنە دەگرێ لە بابەتێك كە زۆر حاڵەتێكی ئاسایی بووە لەكۆمەڵگایەكی ئەو سەردەمەدا، كاتێك شێخ محمود فەقیرانەی بۆ ژمارەیەك لە هاوڵاتیان بڕیوەتەوە كه ئەم كەسانە لە ئاغاو بەگ و مەلاو شێخ پێك هاتوون، لەڕاستیدا ئەولیسته هەموو چین و توێژەكانی لە خۆگرتووە نووسەر دەڵێت، ئەمانە هەموو ئاغاو بگ و دەوڵەمەند بوون، مەرج نیە هەموو دەوڵەمەندبووبن”.
لەدوای ئەو دو وتارەش، پارێزگای هەولێر رونکردنەوەیەکی لەو بارەیەوە بڵاوکردەوەو رایگەیاند “مەلیک مەحمودی نەمر ڕەمزو ھێمایەکی بەرزی نەتەوایەتی کوردە و جێگەی فەخرو شانازی ھەموو خەڵکی کوردستانە، ھەربۆیەش ھەولێری پایتەخت پەیکەری شێخی نەمری لە ئامێز گرتووە و چوارریانەکەش ھەر بەناوی ئەم زاتە شکۆدارە کراوە و یەکێکە لە شاکارو شانازییەکانی خەڵکی کوردستان و ھەولێری پایتەخت بە سەرکردەو ڕەمزو ھێما نەتەوەییەکانی و ھەر دەمێنێ و مایەی ڕێزو حورمەتە”.
هەروەها دەشڵێن “رەخنەگرتنی ھەر نوسەرو کەسێکی شارەزاو نەشارەزاش لە مێژوو و کەسایەتی و رەمزە نەتەوەییەکانمان راو بۆچوون و ھەلوێستێکی تاکەکەسییە و دوورو نزیک ھیچ پەیوەندی بە سیاسەتی حکومەت و پارێزگا و ھیچ حزب و لایەنێکەوە نییە”.
دەقی وتارەکەی فەرهاد پیرباڵ
لەناو رۆژنامەكانی سەردەمی شێخ مەحموود، لەناو لیستی ئەوانەی “فەقیرانە”یان لە بەلەدییەی سلێمانی وەرگرتووە، ناوی دەیان بەگ و ئاغا و شێخ و بەگزادەی – بۆ نموونە وەك “ئەحمەد بەگی شەوكەت بەگ، شێخ حەمەومین ئاغا و فڵان ئاغای ناودار و بەگزادەی شێخ فڵان بەگ” دەبینیت، وەك (سواڵكەر!) ناویان لە رۆژنامەكەی شێخ مەحمووددا تۆمار كراون، “فەقیرانە- سۆسیال”یان لە حكوومەتی مەلیك مەحموود وەرگرتووە!
تۆژەرێكی ئاكادیمی لە ماستەرنامەكەی خۆیدا، ئایا بۆی هەیە ئەم دیاردەیە وەك (گەندەڵی) لە حكوومەتەكەی مەلیك مەحمووددا تاوتوێ بكات یان نا؟! دیاردەی “فەقیرانە وەرگرتن لە حكوومەتەكەی شێخ مەحموود”دا، مژاری دكتۆرانامەیەك لە بەستێنی كۆمەڵناسی و (شێخ مەحموودناسی) هەڵدەگرێت! چۆن؟! بۆ؟
تۆژەری دكتۆرا یان ماستەر لە بەشی مێژوو- ئەدەبیات یان لە بەشی كۆمەڵناسی، دێ ئەم پرسیارانە وەڵام دەداتەوە و دەیانكاتە كێشە لە دەروازەكانی باسەكەیدا:
– ئەو (فەقیرانە)یەی هەموو سەری مانگانێك مەلا ناودار و شێخ و ئاغاكان لە بەشی فەقیران دزیویانە و وەریانگرتووە؛ چۆن بیخوێنینەوە؟ بە چ لۆژیك و مێتۆد و ئایدیۆلۆجیایەك؟!
– ئەرێ “فەقیرانە وەرگرتن” لەلایەن بەگ و ئاغا و بەگزادەكانەوە لەناو حكوومەتەكەی شێخ مەحموود، شتێكی رەوا بووە؟ یان ئایا وەك “بن دیوار”ی ئێستە (گەندەڵی) بووە؟
１- ئەگەر گەندەڵی بێت؟ چۆن؟ هۆكارەكانی چی بوون؟
２- ئەگەریش ئەم گریمانەیە راست نەبێت، كەواتە راستی و واقیعی هەموو ئەو ئاغا و شێخ و بەگ و بەگزادانەی سلێمانی (بەپێچەوانەوە) واهی بوونە-خۆیان؟! (دوو مەلای ناوداریشیان تێدایە كە هەمان فەقیرانەیان وەرگرتووە و ناویان نووسراوە).
３- كەواتە؛ ئایا ئەم دیاردەیە ئەوە دەگەیەنێت كە ئەم پایە و “ناو” و ناسناوانە لە سلێمانی، هەمووی فشەن و هیچ پێوەندییەكیان بە باری راستەقینەی كۆمەڵایەتیی كەسەكانەوە نەبووە؟
４- ئایا ئەو كەسانە، بە فشە، واتە بە درۆ ناسناوی بەگ و شێخ و ئاغا و بەگزادەیان داوەتە پاڵ خۆیان و دەشیانەوێ بیدەنە نەوەكانی داهاتوویشیان؟
５- ئەگەر وا بێت، ئایا ئەم دیاردە ناقۆڵایە مەترسی نییە بۆ سەر بیركردنەوەی نەوەی ئەمڕۆ و ئاسایشی نەوەی داهاتوو؟ مەبەستم مەترسی نییە بۆ سەر هەڵوەشاندنەوەی ئەم فەلسەفە بە پێزەی (مەحوی) كە دەبێ ئینسانی كوردی پێ پەروەردە بكرێت:
فەزیڵەی ئەسڵ و فەسڵ؛ ئینسانی پێ نابێ بە ساحێب فەزڵ!
كە تۆ كۆسەی، بە تۆ چی مامە ریشی باب و باپیرت؟
６- تۆژەر دەسكەوتنی ئەم وەڵامانەی لە دكتۆرانامەكەی خۆیدا لەلا گرنگ دەبێت، چونكە پێوەندییان بە پێكهاتەی دەروونیی تاكی كوردەوە هەیە، جومگەكانی كۆمەڵگەی بنەماڵەیی، سیترووووكتوووری كۆمەڵگەی خێڵەكییان پێ دەخوێندرێتەوە؛ جگە لەوەش ئەم دیاردەیە وەك (گەندەڵی) لە حكوومەتەكەی مەلیك مەحمووددا وەك بەستێنێكی فراوانی لێكۆڵینەوە سۆسیۆلۆژی- دەروونییەكان دێتە ژماردن بۆ تێگەیشتن لە عەقڵی بنەماڵەیی و عەشایەری كە لە سلێمانیدا و لەناو سیستەمی حكوومەتەكەی مەلیك مەحموودی حەفید؛ لەسەر بنەمای چی و چۆن دامەزراوە؟
تۆژەری ماستەرنامەیەك، بێگومان دەتوانێ وەڵامی دروستی ئەم دیاردە نالۆژیكی و ناماقووڵەمان بداتەوە كە لە شاری سلێمانی بەدی دەكرێت!
ئەم لیستی فەقیرانەیەی ناوی بەگ و بەگزادە و ئاغاكانی سلێمانی كە فەقیرانەیان لە بەلەدییەی سلێمانی و شێخ مەحموود وەردەگرت و ناویان لە رۆژنامەی “ژیانەوە و ژیان”دا تۆمار كراوە، خەڵكی وای تێدایە كە ئەولادە ملیۆنێرەكانی ئەمڕۆ، روبعێكی سلێمانی بەناوی ئەوانە! هەر لەبەر هەمان هۆكاریش، نەمویست ناوەكانیان لێرەدا بڵاو بكەمەوە وەك بەڵگە.
من ئەم پرسیارە گرنگانەم كردووەتە ناوەڕۆكی شانۆنامەیەكی خۆم بە ناونیشانی (نووسەرێكی گێل) كە پاڵەوانی سەرەكیی دراماكە، ئەم كەسایەتییە مێژوویی-مەعریفییانەن: (رەفیق حیلمی)، (عادیلە خانمی وەسمان پاشای جاف)، (حەمدیی شاعیر)، خێزانی رەفیق حیلمی، ژنی جەمال عیرفان، حەپسەخان، شێخ مەحموود.
هیوادارم رۆژێك لە سلێمانی دەرهێنەرێكی جەسوور بیخاتە سەر شانۆ و خەڵك ببینێت ئاخۆ من چیم گوتووە؟ دەرهێنەری شانۆناس (دانا رەئووف) پێشگوفتارێكی سۆسیۆلۆژیی شاری سلێمانی بۆ نووسیوە، تێیدا، وای باس كردووە كە شانۆگەرییەكی راستبێژ و سەركەوتووە لەوەی كە (مێژووی سلێمانی)م لەناو شانۆی مۆدێرندا تەوزیف كردووە، دەشڵێ كە راستگۆ بوومە لە گێڕانەوەی حەقیقەتە كۆمەڵایەتی و سیاسییەكانی ئەو سەردەمەی سلێمانی!
دانا رەئووف خەڵكی سلێمانییە و ئازیزی منیش، بەڵام منی نووسەر بە مافی خۆمم زانیوە كام موشكیلە، مەینەتی، مێژوو دەكەمە مژاری رۆمانێكم!
نووسەرێكی گێل، شانۆنامە، دەزگەی ئاراس، هەولێر: ٢٠١١
زۆربەی رۆشنبیرە سلێمانییەكان، بەتایبەت چەپەكانی وەك فوئادی مەجید میسری و هەموو ئەكتەر و دەرهێنەر و هونەرمەندانی شانۆگەریی (راپۆڕت)، ئەگەرچی ئەم دیاردە ناقۆڵا و سەیرەیان رەخنەگیر نەكردووە، بەڵام بە ئاشكرا ددان بە سیاسەتی هەڵەی پان- ئیسلامیزمی “شێخ مەحموود” دادەنێن!
تەنانەت رۆشنبیرێكی گەورەی وەك رەفیق حیلمی لە بەشی هەشتەمی بیرەوەرییەكانیدا ناوی دەنێ “بە سەهوو چوو!”.
ئینجا رۆشنبیرە چەپە سلێمانییەكان چونكە خۆشیان هەر دەزانن لە ئاستی كوردستانی عێراقدا شێخ مەحموودی حەفید بە سەرەتای “سەلەفیەت” و ئیسلامیزم و عوسمانیزم دەزاندرێت، (رەفیق حیلمیش هەر لە كتێبی یاداشتەكانیدا لە بەرگی هەشتەم دەڵێ “بەرژەوەندیی توركیا و عوسمانی پاراست، بۆیە رێگەی هەرگیز نەكەوتە سەر رێبازی بە مەلەكیەتبوونی كوردستان!).
وا بزانم هەر ئەمەیە وای كردووە بەشێك لە خەڵكی سلێمانی، هەر خۆیشیان رێزی ئەو سەركردە رۆح نیگەران و تووڕە و خۆشی لەخۆ نەدیوە ناگرن و پێی دەڵێن “خولە قۆپچە”!
سالم وا بزانم لە هەموو كەسێك باشتر شارە حەیاتەكەی خۆی ناسیوە كە دەڵێ:
“ئەم موڵكە نەزمی نابێ؛ بەبێ زەپتی واریسی!
لەماڵپەڕی “وشە” وەرگیراوە.
دەقی نووسینەكەی مەحمود کاوە حەفیدزادە
خۆشحاڵ دەبین با دەستەڵاتدارانی شاری هەولێر پەیكەرەكەی شێخی نەمر بشكێنن .
بۆ یەكەمجار نیە لە ماوەی دووساڵی ڕابوردودا، میدیا و دەزگاكانی ڕاگەیاندنی پارتی، لەڕێگەی چەند كەسانێكی كۆیلەو ئاراستەكراوەوە هێرشی بەمەبەست و بەئامانج دەكەنە سەر شێخ محمودی حەفید هێمای بەرخۆدانی كوردایەتی . تەنانەت سوكایەتی كردن بەڕێبەرانی تەریقەتی قادری و شیواندنی مێژوویی ڕوداوەكان .
پێم سەیرە پارتی دیموكراتی كوردستان ڕێگە دەدات و ئەودەرفەتە دەڕەخسێنێ بۆ سوكایەتی كردن بە مێژوویی خەباتی شێخ محمودی نەمرو تەنانەت شاری سلێمانیش .
ئەمجارەیان (……..) بەناوی فەرهاد پیرباڵەوە، لەیەكێك لە سایتە سێبەرەكانی پارتیەوە سوكایەتی بەمێژوویی خەباتی شێخ محمود دەكات و لەهەمان كات ڕەخنە دەگرێ لە بابەتێك كە زۆر حاڵەتێكی ئاسایی بووە لەكۆمەڵگایەكی ئەو سەردەمەدا، كاتێك شێخ محمود فەقیرانەی بۆ ژمارەیەك لە هاوڵاتیان بڕیوەتەوە كه ئەم كەسانە لە ئاغاو بەگ و مەلاو شێخ پێك هاتوون، لەڕاستیدا ئەولیسته هەموو چین و توێژەكانی لە خۆگرتووە نووسەر دەڵێت، ئەمانە هەموو ئاغاو بگ و دەوڵەمەند بوون، مەرج نیە هەموو دەوڵەمەندبووبن، پێم وایە یەكێك دەوڵەمەندبووبێت، مووچەیەك وەرناگرێ بەناوی فەقیرانه، جا ئەگەر گریمان دەوڵەمەندبوون دیارە دەبێت وەكو كەسایەتی كۆمەڵایەتی مووچەیان بۆ دابین كرابێت، ئەم حاڵەتە ئیستاش نەك هەر زۆرە بەڵكو بۆتە دیاردەیەكی نامۆ كاتێك لیستی ناوی سەدان وەزیری بێ وەزارەت و بریكار تەنانەت دزو گەندەڵە دەریالوشەكان دەبینێ نقەی نایە، سەیرە بەلامەوە ! ئەم نووسەرە كۆیلەیە بۆ لەئێستاو ئەم قۆناغە ناڕوانێت كەچی دەگوزەرێت لە كوردستان پاش ۹٥ ساڵ بەسەر حووكمڕانی شێخ محمودا ! ئایا شێخ محمود لەو لیستەدا كەفەرمانی بڕینەوەی مووچەی واژۆكردوە بۆ هەژاران، جاش و بەكرێگیراوی تێدایە ؟ ئایا نووسەر بۆچی ڕێگە بەخۆی نادات سەردانێكی دەزگای شەهیدان و خانەنشینان و دەزگا كۆمەڵایەتی یەكان بكات چاوێك بەلیستی ناوەكاندا بگێڕێ و بەراوردیان بكات لەگەڵ لیستەكەی شێخ محمودا ئەو كات دەزانێ چۆن ویژدانی خۆی ئازارداوە چۆن درۆ لەگەڵ خۆیدا لەگەڵ خەڵكیدا دەكات ! لەبەشێكی تری نووسینەكەیدا دەڵێت، شێخ محمود مامۆستای سەلەفیەت بوەو عوسمانیزم بوە، گەرەكیەتی مۆركی شۆڕشگێڕی و كوردایەتی شێخ محمود بەخەیاڵ لەهزری خۆیدا لە شێخ دابماڵێ و ئەو بەرگەی بكاتە بەر كەخۆی و ئەوانەی ئاراستەی دەكەن مەبەستیانە، بەڵام ڕۆشنبیران و گەلی كوردستان هێندەكاڵ فام و هزر نەزۆك نین ڕاستیەكانیان (…) لێ بزر ببێت، من لەم (…) بدەپرسم
پێش ۹٥ ساڵ لەكۆمەڵگایەكی داخراو نەخوێندەوارو عشائێری لەناو گەلێكی موسڵماندا كێ جورئەتی ئەوەی دەكرد جگە لە شێخ محمود بێ گوێدانە پێگەی بنەماڵە ئاینی یەكەی لەپێناوی ماف و داخوازیەكانی كورد نامەیەكی ئاراستەی لینین نەكرد؟
پێرۆزبایی شۆڕشی كومونستی ئۆكتۆبەری نەكرد ؟
لەدەرگای هەموو جیهانی نەدا، ئایا شێخ محمود جگەلە مافی كوردو كوردستان چ ئامانجێكی تری هەبوە ؟ لەنووسه ر دەپرسم بەو پێوەرەی كە شێخ محمودت پێناسەكردوە بەمامۆستای سەلەفیەت، ئایا لەكاتی حوكمڕانی شێخ محمود چەندكەس لە سەر زیناكردن ڕەجم كران یان داری حەدیان لێ درا ؟ ئایا كەس لەسەر دزی كردن دەستی بڕا ؟ ئایا كەس لەسەر مەی نۆشین زیندانی كرا و جەڵدی لێدرا ؟ كوا سەلەفیەت ؟ بەڵی شێخ محمود كەسێكی ئیماندارو موسڵمان بوە، بەڵام هەستی نەتەوایەتی هێندە بەهێزبووە كەلەگەڵ شادەمارەكانی خوێنی دا تێكەڵ بوە ! شێخ محمود هەمیشە خەونی بەماف و ئازادی و سەربەخۆیی كوردستانەوە بینیوە لەو پێناوەشدا جەنگاوەو خوێنی ڕژاوە لەمەیدانی شەڕدا . نووسەر دەڵێت شێخ محمود عوسمانیزم بووە گوایا ڕەفیق حیلمی لەیاداشتەكانیدا دەڵێت شێخ محمود مەیلی بەلای توركدا ڕۆشتووە، هیچ بەڵگەیەك ئەوە ناسەلمێنێ كە شێخ محمود باوەڕی بەتورك كردبێ لەكاتێكدا خۆی كوڕە شەهیدی دەستی توركە، برا شەهیدی دەستی توركە، میللەتەكەی بینیوە لەسەردەمی حوكمی توركدا لەچ دۆزەخێكدا بووە چەند ستەمی لێكراوە، شێخ محمود خۆی لەپەتی سێدارەی تورك ڕزگاری بوو كاتێك زانیان شێخ محمود پەیوەندی بە ئینگلیزەوە كردووە، نەخێر ئەوە تەنها بۆچونی ڕەفیق حیلمی یە، بەڵام دوورە لەواقیع، شێخ محمود كاتێك كە لە ئینگلیزەكان نائومێد بوو، لەقۆناغی خەباتی چەكداری و شۆڕشدا هەوڵی داوە پەیوەندی درووست بكات لە گەڵ ئێران و هەروەها توركیاش تاسوود لەدەرفەت وناكۆكیەكان ببینێ بەقازانجی كوردو شۆڕشەكەی یەكلایی بكاتەوە، وەكو هەموو شۆڕشەكانی كورد بەپاڵپشتی ئێران و سوریاو وڵاتانی دراوسێ درێژەیان بەخەباتی چەكداریدا دژی ڕژێمی بەغدا ئایا دروستە بڵێین شۆڕشەكانی كورد نۆكەری ئێران و وڵاتانی دراوسێ بوون ؟ نووسەر پێویستە بەبەڵگە بیسەلمێنێ ئایا شێخ محمود بڕوای بەتورك هەبوە یان هاوكاری توركی كردووە باناحەزانی شێخ محمود بەڵگە بخەنە ڕوو نەك فلان كەس وایگوت یان بۆچونی وابوو، ئەگەر باس لە شەڕی شوعەیبە دەكرێ ئەوە قۆناغەكە جیاوازە، نەك شێخ محمود بەڵكو شێخ عوبیدڵای نەهریش لە ژێرفشاردا بەشداریان پێكراوە لەجەنگە گەورەكانی عوسمانیدا هەروەها هەموو نەتەوەكانی قەڵەمڕەوی ئیمبراتۆریەتیان ناچاری جەنگە خوێناویەكانیان كردووە بە ئەوروپیەكانیشەوە، بەڵام كێ بوو ڕاپەڕینی دژی توركەكان كردو لە بەشێكی زۆری كوردستان دەریكردن شێخ محمود نەبو ؟ ئەگەر یەكێكی تر بوو باپێمان بڵێ ئەم كۆیلەیە ؟ دەپرسم بۆنایە سەیری بۆچونی شێخ محمود بكات لەسەر توركەكانی عوسمانی بزانە ئەو چی دەڵێت ؟ چونكە ئەمەگرنگترە لەكارەكتەری ڕوداوەكان ببیستی !
لەبەشێكی تردا دڵخۆشە بەوەی گوایا خەڵكی سلێمانی چارەی شێخ محمودیان ناوێت، نازانم مەبەستی چی یە لەمەدا؟ هەرچۆنێك بێت ئەوە مێژوویی گەلێكە، ڕەخنەگرتنی بابەتیانە بۆ ڕابوردوو بۆ مێژوو درووستە نەك بەپێوەری ئەم سەردەمە لەجێگەی خۆیدایە و شێخ محمودیش مرۆڤە و بەدەر نیە لە هەڵەو كەم و كوڕی مافی هاوڵاتیانە لەسەر مێژووی باوك و باپیرانیان و شێخ محمودیش بدوێن و بۆچونی خۆیان بخەنەڕوو ڕەخنەی لێ بگرن، بەڵام سوكایەتی كردن و بێ ڕێزی كردن وەك ئەوەی ئەم (…) دەیكات ناچێتە خانەی ڕەخنەیی بەڵكو ناپاكی یه بەرامبەر مێژووی گەلی كورد، پێم وایه مەبەستەكە ڕوونە ئەم هەوڵانە نەزۆكن جگە لەڕیسوابوون و بێ ئەنجامی هیچی دیكەی لێ سەوز نابێت، هەر ئەم نووسەرە بوو لە ڕابوردودا بانگەشەی ئەوەی كرد و داوای لە كاربەدەستانی شاری هەولێر كردبوو پەیكەرەكەی شێخ محمود لاببەن ئەگەر نا دەیشكێنێ ئێمەش دەڵێین بەدەستەڵات دارانی هەولێر هەرچی زووە ئەو پەیكەرە لابدەن تا لەوەزیاتر كەسانی وەكو پیرباڵ و نموونەكانی نیگەران نەكات .
