Home / بەشی مێژووی كورد / عەبدولقادری تەوحیدی: ناسری سوبحانی لەگەڵ كاری چەكداری نەبوو، درێژەی بە كاری ئیخوان دا

عەبدولقادری تەوحیدی: ناسری سوبحانی لەگەڵ كاری چەكداری نەبوو، درێژەی بە كاری ئیخوان دا

hqdefault

عەبدولقادری تەوحیدی: ناسری سوبحانی لەگەڵ كاری چەكداری نەبوو، درێژەی بە كاری ئیخوان دا

ئیدریس سیوەیلی
لەم گفتوگۆیەدا، عەبدولقادری تەوحیدی دامەزرێنەری بزووتنەوەی ئەهلی سوننە و جەماعەی ئێران، باس لە رێگوزەری مێژوویی ئەو پارتە دەكات، سەرەتاكانی دەستپێكردنی كاری ئیخوان لە رۆژهەلاتی كوردستان و پەیوەندی بە كەسایەتییەكانەوە دەخاتەڕوو، باس لە كار و چالاكیی و خەباتی چەكداری دژی ئێران و هەوڵەكانی حكومەتی بەعس دەكات بۆ نزیكبوونەوە لێێان دژی ئێران.

سەرتا دەمەوێت بپرسم عەبدولقادری تەوحیدی كێیە؟
عەبدولقادری تەوحیدی: بەناوی خوای بەخشندە و میهرەبان، ساڵی (1952) لە گوندی لاوران سەر بە هەڵەبجە لەدایكبوم، تەمەنم مناڵ بوو مامۆستایەكی ئایینی لە رەمەزان لە گوندەكەمان بوو ناوی مەلا مەحمود بوو، رۆژێك بینیم كۆمەلێك مناڵی لە دەوری خۆی كۆكردبوویەوە و ئەلفبێێ پێدەوتن، منیش چووم بۆلایان وانە بخوێنم، بەڵام مامۆستا وتی كاغەزم لا نییە پیتەكانت بۆ بنووسم، ئەوكاتە وەكو ئێستا نەبوو كاغەز و قەڵەم زۆربێت، لە گوندەكەمان كاغەز كەم بوو، ئامۆزایەكم چەند لاپەڕەیەكی پێدام و بردم بۆلای مامۆستا ئەویش پیتەكانی بۆ تیانووسیم و ئەمە سەرەتای فێربوونی خوێندەواری بوو، ئیتر هەر لای ئەو مامۆستایانەی دەهاتنە گوندەكەمان لە رەمەزاندا فێری خوێندنەوەی قورئان بووم، تا تەمەنم گەیشتە دە ساڵان برایەكەم هەبوو لەخۆم گەورەتر پێی وتم قوتابخانەیەكی ئایینی لە هەڵەبجە دانراوە و هانیدام لەوێ بخوێنم، ساڵی (1962) هاتمە ئەوێ و دەستم كرد بە خوێندنی زانستە شەرعییەكان، بە پێنج ساڵ خوێندنم تەواو كرد، پاشان تاقیكردنەوەیەكم كرد و لە پۆلی یەكی ناوەندی پەیمانگای ئیسلامیی وەرگیرام، ساڵی (1972) پەیمانگام تەواو كرد و ئیجازەی زانستیم وەرگرت لای شێخ نورەدینی موفتی.

كەی بە بیری ئیخوان ئاشنابوویت؟
عەبدولقادری تەوحیدی: ئەوكاتەی چومە حوجرە بۆ خوێندن مامۆستاكانم هەڵگری بیری ئیخوان بوون، هەرچەندە من مناڵ بووم، دەتوانم بڵێم من لە رێگەی مامۆستا مەلا محەمەد عومەر عەبدولعەزیز بە بیری ئیخوان ئاشنا بووم، ئەو تەمەنی لە ئێمە زیاتر بوو، ئیتر وردە وردە چوینە ناو ئیخوان، زۆرتریش مامۆستا جەلالی مەلا ساڵح قسەی لەگەڵ دەكردین و باسی ئیخوانی بۆمان دەكرد.

لەناو رێكخستنەكانی ئیخوان چ وانەیەكتان دەخوێند؟
عەبدولقادری تەوحیدی: زیاتر ئەو ئایەتانەیان بۆ شیدەكردینەوە كە باسی رەوشت و بانگەواز و ئەوانەی دەكرد، هەفتانە بەردەوام كۆبوونەوە هەبوو كە وانەمان دەخوێند.

هاوڕێكانت كی بوون كە لە رێكخستنی ئیخوان پێكەوە بوون؟
عەبدولقادری تەوحیدی: ئەوەی لەبیرم مابێت، فەقێ ئەحمەد هەبوو خزمی خۆمان بوو، عەلی عەبدوڵا پریسی و حەسەن شەمێرانی، ئەمانە زۆر تێكەڵاوبووین پێكەوە.

ماوەیەك لە ناو یەكێتی زانایانی ئیسلامیی كارت كرد، ئەوە چۆن بوو؟
عەبدولقادری تەوحیدی: ساڵی 1972 كە ئیجازەی مەلایەتیم وەرگرت، لەو ماوەشدا مامۆستا مەلا عوسمان عەبدولعەزیز چوبووە لای مەلا مستەفا بارزانی و پێی راگەیاندبوو كە دەمانەوێت ئازادانە بانگەوازی ئیسلامیی بكەین و یەكێتی زانایان دروست بكەین، بارزانیش پشتیوانی خۆی بۆ دەربڕیبوون، ئیتر ناوچەكان دابەشكرا، ئەوبەری سیروان لیژنیەكی هەبوو سەرپەرشتی كاروباری مەلاكانی دەكرد، سەرۆكی لیژنەكە شێخ ساڵح بوو منیش سكرتێری ئەو بووم، چوار كەسی تریش لە ناو لیژنەكەدابوون، مەلا ئەحمەدی لوتفوڵا و چەند مەلایەكی تربوون ناوەكانم بیرنەماوە.

كار و چالاكیتان چی بوو؟
عەبدولقادری تەوحیدی: رێكخراوەكە تایبەت بوو بە مامۆستایانی ئایینی، ئەوەی دەبووە ئەندام ئابونەی دەدات، كارمان بڵاوكردنەوەی بانگەواز بوو، من داوام كرد ئابونە لە مامۆستایانی وەرنەگیرێت، بەڵام ناوچەی هەڵەبجە بە قسەیان نەكردم، ئیتر لەسەر ئەوە نێونمان تێكچوو و وازم لە رێكخراوەكە هێنا. ماوەیەكیش بوومە پێشمەرگە تا هەرەسی شۆڕش و ئیتر چوومە ئێران.

ئەی كەی چوونە ئێران و لەوێ دەستتان بە چالاكی كرد؟
عەبدولقادری تەوحیدی: دوای هەرەسی شۆڕشی ئەیلوول چوومە ئێران، لە ئۆردوگا بووین، مامۆستا حەیدەری زیائی خەڵكی پاوە بوو وانەی پێدەوتم، رۆژێك باسی كاری ئیسلامییم كرد لەگەڵی، بەڵام ئەو بێدەنگ بوو، دواتر زانیم لەبەر باردودۆخەكە بێدەنگی هەڵبژارد و قەناعەتی بە كاری ئیسلامیی زۆر بوو، دواتر حكومەتی ئێران ئێمەی گواستەوە بۆ تەبرێز، لەوی وانەم دەوتەوە بە هەندێ لەو كەسانەی لەگەڵم بوون، هاوكات ئیشتراكم هەبوو لە گۆڤاری (التربیة الاسلامیة) كە لە بەغداد دەردەچوو بۆم دەهاتە ئۆردوگا، جارێكیش وتارێكم نووسی و لەو گۆڤارە بڵاوبوویەوە. تا شۆڕشی ئیسلامیی هەر بە شێوەیەكی سنوردار كارمان هەبوو. من بە قاچاخی لە تەبرێزەوە هاتمە كرمانشا و لەوێشەوە بۆ پاوە، لەوێ كۆمەڵێك خزمی خۆم هەبوو، بورهان كەریمی و مەحمود ناوێك پێكەوە كەوتینە جموجۆڵ، توانیم ژمارەیەك كەس لە دەوی كاری ئیخوان كۆبكەمەوە.

هەر لەو قۆناغەدا باس لە ناسری سوبحانی دەكرێت كە بەناوی ئیخوانەوە كاری كردووە، ئەو پەیوەندی بە كێوە هەبوو؟
عەبدولقادری تەوحیدی: مەلا ئەحمەدی بارامی هەبوو هاوكارم بوو لەگەڵ ئێمە كاری دەكرد، وتی مەلایەك هەیە بە ناوی ناسری سوبحانی كەسێكی زیرەك و خوێندەوارە، پەیوەندی پێوە بكە با بێتە ریزی ئیخوان، شەوێك لە مزگەوتێكی پاوە وانەی هەبوو، چوم دانیشتم و دوای وانەكە خۆم پێناساند و قسەمانكرد و ئەویش بەڵێنی دا كارمان لەگەڵ بكات، ئیتر دوای ئەوە كتێبی (أصول الدعوة)م بە پێدەوتەوە، ئیتر پەیوەست بوو بە منەوە، ئەویش بەشێوەیەكی باش كەوتە بڵاوكردنەوەی بیری ئیخوان.

ئەی ئاشنایەتیت لەگەڵ ئەحمەدی موفتی زادە هەبوو؟
عەبدولقادری تەوحیدی: پێشتر كە لە هەڵەبجە بووم ناوی ئەوم بیستوو، بەڵام نەمبینیبوو، لەگەڵ كاك ناسر و مەلا عەبدوڕەحمان یەعقوبی و چەند كەسێكی تر چووین بۆلای لە سنە، دوو بە دوو قسەمان كرد و پێم وت كە من لەسەر بەرنامەی حەسەن بەننا رێكخستنی ئیخوانم دروستكردووە، ئەو پێی وابوو دۆخی ئەوكاتەی كوردستان و ئێران گۆڕانكاری زۆری بەخۆوە بینیوە و دروستكردنی ئەو رێكخستنە درەنگكەوتووە، بۆیە رای وابوو با رێكخستنەكە هەبێت بەڵام حیزبێك یان شتێكی تر واكو رووكارێك دروستبكەین، بۆیە بڕیارماندا پێكەوە هاوكاربین و كاربكەین لەژێر ناوی قوتابخانەی قورئان، بەڵام دوای چەند مانگێك كاك ئەحمەد حیزبێكی بەناوی (حیزبی مساواتی ئیسلامیی) دروستكرد.

كەواتە كاك ئەحمەد نەبووە ئیخوان؟
عەبدولقادری تەوحیدی: نەخێر نەبووە ئیخوان، بەڵام پشتگیری دەكرد و پێی باش بوو.

حیزبی مساواتی ئیسلامیی كە ئەحمەدی موفتی زادە دایمەزراند چۆن بوو؟
عەبدولقادری تەوحیدی: لە پاوە بووم كە بیستم كاك ئەحمەد ئەو حیزبەی دامەزراندووە، كاك ئەحمەد ناردی بەدوای من و رەحمەتوڵا عەلی پور لە سەردەشت بۆ قسەكردن لەسەر بەرفراوانكردنی كاری ئەو حیزبە، پێم وت ئەوە ئیخوان هەیە و نابێت حیزبێكی تریش دروست بكەین، بەڵام ئەو رای وابوو ئەمە دژیەك نییە، حیزبی مساوات وەكو قۆناغێكی ئامادەكردن وایە بۆ ئەوەی خەڵك بچێتە ناو ریزی ئیخوان، ئەو دەیویست هەركەسێك ئیسلامی خۆشبوێت با نوێژیش نەكات بیكەنە ئەندامی حیزبی مساوات و وردە وردە وانەی بۆ دانێن و فێری ئیسلامی بكەن. منیش بڕیارمدا هاوكاری بم، پەیوەندیمان بە چەند كەسەوە كرد تا هاوكارمان بن لەو حیزبە، بەڵام نەمانتوانی كەس قەناعەت پێ بكەین كارمان لەگەڵ بكات.

ئەی بڕیاری چیتان دا؟
عەبدولقادری تەوحیدی: لەگەڵ كاك ئەحمەد كۆبوونەوەیەكمان كرد و ئەنجامی هەوڵەكانمان پێ وت كە ئەو كەسانەی پەیوەندیمان پێوەكردوون هیچیان ئامادەنەبوون لەو حیزبەدا كاربكەن، دواجار بڕیارمان هاتەسەر ئەوەی دەستبەرداری حیزبەكە ببین و لەژێر ناوی مەكتەب قورئان درێژە بە كار بدەین. ئیتر هەركەسە و لای خۆیەوە بەردەوام بووین لە كار و هاوكاری باش لە نێوانمان هەبوو، ئێمە هەر بەناوی ئیخوانەوە كارمان دەكرد.

هیچ پەیوەندییەكتان بە ئیخوانی دەرەوە هەبوو؟
عەبدولقادری تەوحیدی: نەخێر هیچ پەیوەندییەكمان نەبوو، هەر خۆمان بە ناوی ئیخوانەوە كارمان دەكرد لەسەر نەهجی ئیخوان.

دەوترێت لەو ماوەدا چەند جارێك سەردانی ئایەتوڵا خومەینیتان كردوە، بۆچی چوون بۆلای؟
عەبدولقادری تەوحیدی: یەكەم جار كە چووین من و ناسری سوبحانی، عەبدوڕەحمان یەعقوبی، حەیدەری زیائی و كوڕێكی كاك حەیدەر كە شوفێری ئۆتۆمبێلەكەمان بوو، خومەینی كەسێكی خاكیی بوو، وتوێژی زۆرمان كرد، ئەو وتی من دەمەوێت قورئان حاكم بێت، ئێمەش وتمان ئەگەر قورئان حاكم بێت ئێمەش سەربازی ئەو قورئانەین. جاری دووەم ئەوكاتە بوو كە رەشنوسی قانونی بنەڕەتی لە ئێران بڵاوكرایەوە، لە ماددەی سیانزەی رەشنووسەكەدا هاتبوو كە سەرۆك كۆماری ئێران دەبێت شیعەی دوانزە ئیمامی بێت و ئایینی رەسمی وڵات ئیسلامە لەسەر مەزهەبی شیعەی دوانزە ئیمامی، وەفدێكی حەوت كەسی چووین بۆ لای خومەینی، پێمان وت ئەمە پەرتەوازەیی دروست دەكات و كێشەی لێدەكەوێتەوە، ناوبراو وتی چاكی دەكەین، لەو سەردانەدا ناسری سوبحانی بەناوی هەموومانەوە قسەی كرد، هەر لەو سەردانەدا چاومان كەوت بە ناسری مەكاریمی شیرازی كە یەكێك بوو لە دانەرانی رەشنووسەكە، قسەمان لەگەڵ كرد، بەڵام ئەو وتی ئێمەی شیعە بۆخۆمان شۆڕشمان كردوە و خوێنمان داوە، ئێوەش بچن شۆڕش بۆ خۆتان بكەن. ئێمە هەر بێ هیوانەبووین، تا قانونی ئەساسی دەرچوو تەنها ژمارەی ماددەكە گۆڕابوو كرابووە مادەی دوانزە  و ناوەرۆكەكەی وەكو خۆی بوو.

ئێوە وەكو كورد چون یان وەكو سوننە؟
عەبدولقادری تەوحیدی: ئێمە سەرەتا وەكو كورد چووین، بەڵام دواتر لە شوێنانی تریشەوە پشتگیریمان بۆ دەربڕا و بووە داواكاری سەرجەم سوننە.

دوای ئەوە سەردانی خومەینیتان كردەوە؟
عەبدولقادری تەوحیدی: جاری سێیەمیش چووینەوە لای خومەینی، بەڵام سەردانەكە بێ ئەنجام بوو، هیچی لێ سەوز نەبوو، بە نائومێدی گەڕاینەوە، زانیمان حكومەت جێ پێی خۆی داكوتاوە، هەر لەو سەفەرەدا هەندێكمان بڕیارماندا ئیتر بە هیچ شێوەیەك هاوكاری حكومەت نەكەین، من و ناسری سوبحانی لەوانە بووین.

هەنگاوی دوای ئەوەتان چی بوو؟
عەبدولقادری تەوحیدی: زۆری نەبرد حكومەت كەوتە گرتن و راوەدونانی ئێمە، باش بوو كاك ئەحمەد دەرچوو نەكەوتە بەردەست، بەڵام نزیكەی 180 كەس گیران، كە پانزە ئافرەتیان تێدابوو، منیش لەناو گیراوەكاندا بووم، لە بەندیخانە وانەم دانا، بەڵام زۆری نەخایاند ئازاد كرام، بەڵام دواتر كاك ئەحمەد لە تاران دەستگیر كرا.

دوای ئازادبوونت چیتان كرد؟
عەبدولقادری تەوحیدی: كۆبوونەوەیەكمان كرد و كەوتینە گفتوگۆ كە چی بكەین، بووینە دوو بەرە، من پێموابوو دەبێت چەك هەڵگرین، سەرەتا ژمارەیەكی زۆر كەس بەڵێنیان پێمدا كە پێكەوە كاری چەكداری بكەین، بەڵام دوای ئەوەی چەكمان هەڵگرت دوانزە كەس لەگەڵمان مانەوە و پێكەوە دەرچووین.

ناسری سوبحانی رای چی بوو سەبارەت بە خەباتی چەكداری؟
عەبدولقادری تەوحیدی: ئەو لەگەڵی نەبوو، مایەوە و بەناوی ئیخوان درێژەی بە كاردا و خەریكی بانگەواز بوو.

كەی دەستتان كرد بە خەباتی چەكداری؟
عەبدولقادری تەوحیدی: ساڵی 1982.

ئەم جموجۆڵەتان ناونا چی؟
عەبدولقادری تەوحیدی: سەرەتا ناومان نا بزووتنەوەی ئیسلامیی ئێران، دواتر ناوەكەمان گۆڕی بۆ بزووتنەوەی ئیسلامیی ئەهلی سوننە و جەماعەت.

ناسنامەی بزووتنەوەكەتان كوردی بوو یان سوننە؟
عەبدولقادری تەوحیدی: هەرچەندە ئێمە هەموومان كورد بووین و هیچ ئەندامێكمان لە نەتەوەكانی تر نەبوو، بەڵام بە ئەركی خۆمان دەزانی كە ئەهلی سوننە لە هەرشوێنێك بێت پشتگیری لێ بكەین.

ئۆرگانەكانی حیزبتان تەشكیل كرد؟
عەبدولقادری تەوحیدی: نەوڵا چونكە ژمارەمان ئەوەنە زۆر نەبوو تا تەواوی ئۆرگانەكان تەسكیل بكەین، ئێمە دوو ساڵ خەباتمان كرد ژمارەمان گەیشتە (38) كەس و لەوە تێنەپەڕی.

كێ هاوكاری مادی كردن؟
عەبدولقادری تەوحیدی: كەس هاوكاری نەكردین، دوای ساڵ و نیوێك بارەگامان هێنایە دەروبەری هەڵەبجە، حكومەتی ئێران لێبوردنی دەركرد، منیش بە برایانم وت كێ حەز دەكات با سوود لەو لێبوردنە وەرگرێت. هەندێك برا گەڕانەوە ئێران، ئێمەش لە كار بەردەوام بووین.
ناوەندی كوردستان: لەو ماوەدا چ چالاكییەكی سەربازیتان ئەنجامدا؟
عەبدولقادری تەوحیدی: چالاكیی بانگەوازمان هەبوو، چالاكی سەربازیشمان هەبوو، چەند شەڕێكمان بوو لەگەڵ حكومەت، یەكەم شەڕمان لە هانەسلێمان لە (شوباتی 1984) بوو، دوو شەهیدمان دا.

پەیوەندیتان لەگەل حزبە كوردییەكان هەبوو؟
عەبدولقادری تەوحیدی: پەیوەندی رەسمیمان لەگەڵ كەسیان نەبوو، بەڵام دژایەتیشمان نەدەكردن، دەمانویست لەگەڵ كەسیان شەڕمان نەبێت و خەریكی كاری خۆمان بین.

لەو ماوەدا لەگەڵ حكومەتی ئیرانی دانوستانتان كرد، بۆ نەگەیشتنە ئەنجام؟
عەبدولقادری تەوحیدی: یەكجار لەگەڵ حكومەت كەوتینە دانوستان، شەش مانگێك بوو خەباتمان دەستپێكردبوو، دانوستانمان لەگەڵ كردن.

داواكاریەكانتان چی بوون؟
عەبدولقادری تەوحیدی: داوای ئازادكردنی گیراوەكان كە لەو كاتەدا ژمارەیەكی زۆر خەڵكمان گیرابوو، خوێندن بە زمانی دایك بێت لە هەموو ناوچەكان، ئیهانەی پیرۆزیەكانی موسڵمانان بە تایبەت ئەهلی سونە نەكرێت، رێگە بدرێت مزگەوتی سوننە لە تاران دروستبكرێت، هەر كەسێك لە ناوچەكەی خۆی سەربازی پێ بكرێت، دروستكردنی مەدرەسەی دینی لە كورستان و ناساندنیان بە رەسمی.

هیچ پەیوەندییەكتان بە دەرەوەی كوردستانەوە هەبوو؟
عەبدولقادری تەوحیدی: لەو كاتەدا كەسێكمان چووە حەج، داوام لێكرد پەیوەندی بكات بە (یەكگرتووی جیهانی ئیسلامیی) لە شاری مەككە، بەڵام هیچ ئەنجامێكی نەبوو، تەنانەت ئەو كەسە لە سعودیە گیرا و تەسلیمی ئێران كرایەوە و ساڵێك لە بەندیخانەبوو.

دەوترێت كە هاتنە ناوچەی هەڵەبجە حكومەتی بەعس پەیوەندی پێوەكردون تا هاوكاریتان بكات؟
عەبدولقادری تەوحیدی: ئێمە لە كەوتان بارەگامان دانا، حكومەتی بەعس لە رێگەی مستەشارێكەوە پەیوەندی پێوەكردین، ئێمە پێش ئەوەی بێینە عێراق نوێنەرمان ناردبوو تا كارئاسانیمان بۆ بكات بێنە عێراق، بەڵام تا نوێنەرەكە هاتەوە ئێران ئێمە گەیشتبووینە سنوری عێراق و ئەومان نەبینیەوە، بەڵام لە رێگەی ئەو مستەشارەوە من چووم بۆ كەركوك، ئەوان ویستیان هاوكاری مەرجدارمان بكەن، دەیانوت ماددەی تەقینەوەتان دەدەینێ بچن لە شارەكان بیتەقێننەوە یان پرد و شوێنە ستراتیژیەكان بتەقێننەوە و با كەسانی ئێمەش لەگەڵتان بێن بۆ ناو ئێران بۆ كۆكردنەوەی زانیاری هەواڵگری و سیخوڕی، منیش ئەوانەم رەتكردەوە و گەڕامەوە بێ ئەوەی هیچ هاوكاریەك وەرگرم.

ئەی پەیوەندیتان لەگەڵ سازمانی خەبات چۆن بوو؟
عەبدولقادری تەوحیدی: لە سەر بانگهێشتی خۆیان چووم بۆ لایان بۆ ماوەت لە شارباژێر، ئەوكاتە بارەگایان لەوێ هەبوو، بەڵام ئەوانیش لەناو خۆیاندا ناكۆك بوون، پێنج كلاشینكۆف و بڕیك پارەیان بە دیاری پێداین، دواتر ئەوانیش بونە دوو بەش، لە كاتی پرسەی كوڕەكەی مامۆستا شێخ عزەدین هاتم بۆ سلێمانی و بەشداریمان كرد، دوای پرسەكە، مامۆستا شێخ عزەدین وتی حەزم ئەكرد هاوكاریتان بكەین بەڵام دەروبەرەكەم نەیانهێشت، ئێستاش چیتان دەوێت بە من بكرێت بۆتان بكەم، منیش داوام كرد هاوكاریەك بۆ كەسوكاری شەهیدەكانی ئێمەش دابین بكەن و رێگەم بدەن لە رادیۆكەیانەوە بەرنامە پێشكەش بكەم، ئەوەشم پێ وتن كە من پێمخۆشە زیاتر لێتان نزیكبمەوە بەڵام هەرگیز رازی نابم شەڕی بەشەكەی تری سازمانی خەبات بكەم كە مامۆستا خدر عەباسی بەرپرسیان بوو، بەڵام بەداخەوە دوای ماوەیەك هەردوولا بەشەڕهاتن، ئیتر من جارێكی تر لە خەبات دووركەوتمەوە.

دوای دووركەوتنەوەتان لە سازمانی خەبات چالاكیتان بەردەوام بوو؟
عەبدولقادری تەوحیدی: لە رانیە و دەوروبەری ماینەوە و كەم كەم چالاكیمان هەبوو، بەڵام حكومەتی بەعس ئاگاداری كردین كە نابێت چالاكی بنوێنین یان دەبێت بچینە باشووری عێراق یان ناوچە قەدەغەكراوەكان، ئێمەش ئەوەمان لا قورس بوو قبوڵمان نەكرد، ئیتر ساڵی (1990) بارەگامان بردە ناوچە قەدەغەكراوەكان و لە بایاوان بارەگامان دانا، حیزبی دیموكرات و سازمانی خەباتیش لە دەوروبەرمان بوون بارەگایان هەبوو.

ئەی دوای راپەڕینی ئازاری 1991 نەهاتنەوە شارەكان؟
عەبدولقادری تەوحیدی: بەڵی هاتینەوە ناو شارەكانی هەرێم و هەر لە خەباتی بانگخوازی بەردەوام بووین، بەڵام هیچ بارەگا و چالاكی چەكداریمان نەماوە.

دەوترێـت هەندێك لەوانەی ئەندامی ئێوە بوون لەم دواییانەدا پەیوەندیان كردوە بە رێكخراوە توندڕەوەكانەوە و كاری خۆكوژیان كردووە؟
عەبدولقادری تەوحیدی: ئەندامانی ئێمە لە ناوخۆی ئێران كەسانی دڵسۆز و ئازا بوون، هەندێك لەو رێكخراوە ئیسلامییانە دەچوونە لای ئەو ئەندامانە و باسی ئەوەیان بۆ دەكردن كە ئێمە شەرعیەتمان نییە و جیهاد ناكەین و دانیشتووین، سودی خراپیان لە دووری ئێمە لە ناوخۆی ئێران بینیوە و بەم جۆرە قسانە قەناعەتیان بە هەندێك لەو كەسانە كردوە و بوونەتە ئەندامی ئەو رێكخراوانە، بەداخەوە هەندێكیان كاری توندوتیژیان ئەنجامداوە.

 

About گۆران حكيم

https://www.facebook.com/goran.hakem.5

Check Also

شۆڕشی دوەمی بارزان ١٩٤٣_١٩٤٥

بێگەرد عەلیبەشی مێژوو-زانكۆی سۆران شۆڕشی دووەمی بارزان بەسەرۆکایەتی مەلا مستەفای بارزان یەکێکە لەو شۆڕشە نیشتیمانیانەی …